الشارع المغاربي – إعداد بية المالحة : سي الياس المنكبي الرئيس المدير العام متاع تونس الجوية، تِنْكِبْ، ولّى منكوب… ماو حتى هو سرقولو دبيشاتو في المطار، كي الناس الكل… معناها موش على خاطرو هو رئيس تونس الجوية ما يصيرلو شيء… معناها الّي يركبو في طيارات تونس الجوية الكلّهم في الهوى سوا : يستناو من 3 حتى الـ 10 سوايع باش يركبو في الطيارة، يبداو يديهم على قلوبهم لا يصير عطب للطيارة على خاطر ثمة الّي قِدَامُو، ووقتلّي يهبطو مالطيارة سالامات ما يعرفوش رواحهم باش يلقاو فاليجاتهم ولاّ لا…
الحاصيلو السفر على طياراتنا ولّى كي الحرقة في البحر، ما يعرفش الواحد باش يروّح لداروا ولاّ باش يطلع بحذا الرفيق الاعلى من غادي الغادي… أما هوْكا سي المنكبي بشّرنا بحويجة تفرّح القلب، قالك السرقة نقصت برشة، في 2013 سجلت 2016 سرقة وفي 2018 سجلت 270 أكاهو… خطوة باهية الحقيقة وتفرح… وزعمة كيفاش عملو ؟ تي في بلادنا السارق ديمة يغلب الّي يحاحي.. تي هاذي معجزة عملتها تونس الجوية… يا خويا باليكشي يكذبو؟ معقول في تونس ثمة شركة تنقص فيها السرقة وما تزيدش؟ أيا نبقيكم على خير..
صحيتك يا سى المسؤول ولا ما تحشم اذا انت سرقولك دبشك ماذا نقول عن لركاب شوف شركة اخرى اخدم فيها خماس شركة الطيران ياسر عليك
اطلعت مؤخرا على تحقيق يخص حماية مطار اورلى الفرنسى من السرقات حاول الاطلاع عليه المصيبة انكم تكرشوا في المكاتب طبعا هذا هوالمسؤول في تونس